முஸ்லிம்களின் சடலங்களை எரிக்க வேண்டும்: மோடியின் சகா!

மயானங்களுக்கு போதிய இடம் இல்லாததால் முஸ்லிம்களின் சடலங்களை புதைப்பதற்கு பதில் எரிக்க வேண்டும் என்று தெரிவித்து புதிய சர்ச்சையை உருவாக்கியுள்ள இந்தியாவின் ஆளும் பாரதீய ஜனதா கட்சி நாடாளுமன்ற உறுப்பினர் சாக்ஷி மகராஜ்.

இந்தியாவில் நிலப்பற்றாக்குறை இருப்பதால் எல்லோருக்கும் பொதுவான ஒரே மயானமே இருக்க வேண்டும் எனவும் அங்க அனைவரது உடல்களும் எரிக்கப்பட வேண்டும் எனவும் மேலும் தெரிவித்துள்ள அவர், ஒவ்வொரு முஸ்லிம் மையவாடிக்கு அருகிலும் சடலங்களை எரிக்கும் வசதியுடனான இடமும் கட்டியெழுப்பப் பட வேண்டும் என பிரதமர் மோடி தெரிவித்துள்ளதை ஏற்றுக்கொள்ள முடியாது எனவும் தெரிவித்துள்ளார்.

பத்தேபூர் எனும் இடத்தில் தேர்தல் பிரச்சாரத்தில் ஈடுபட்டிருந்த பிரதமர் மோடி, ஒரு கிராமத்தில் முஸ்லிம் மையவாடி அமைக்கப்பட்டால் அதற்கருகில் சடலங்களை எரிக்கும் வசதியுடன் ஒரு இடமும் இருக்க வேண்டும் எனவும் மையவாடிக்கு மின்சாரம் வழங்கப்பட்டால் அருகிலுள்ள இடத்திற்கும் வழங்கப்பட வேண்டும் எனவும் அனைத்து விடயங்களிலும் சமவுரிமை பேணப்பட வேண்டும் எனவும் தெரிவித்திருந்தார்.

எனினும், அதற்கொரு படி மேல் சென்றுள்ள சர்ச்சைக்குரிய குறித்த நபர், முஸ்லிம்களுக்குத் தனியான சலுகை அவசியமில்லையெனவும் அனைவரது சடலங்களையும் எரிக்க வேண்டும் எனவும் தெரிவித்துள்ளமை குறிப்பிடத்தக்கது.